Шеесет и осум лица загинаа во немирите и пожарот во затвор во полициска станица во венецуелски град Валенсија во централниот дел на земјата.
Информацијата е објавена откако роднините на притворените се собрале да дознаат што се случува. Откако им било соопштено дека има жртви, тие се обиделе да велзат во објектот, по што полицијата употребила солзавец да ги растера.
Локалните власти не соопштија никакви информации за тоа што се случувало во станицата до доцна вечерта.
Обвинителството назначило четворица обвинители кои треба да разјаснат како точно се случиле трагичните настани во кои загинааа десетици лица, напиша на Твитер главниот обвинител Тарек Сааб.
Објектот што е поврзан со полициската станица, има капацитет од околу 60 притвореници. Но, затворите во Венецуела се хронично пренатрупани, со објекти што се распаѓаат и се соочуваат со недостиг на персонал.
Во 2015 година, последната година за која се достапни веродостојни податоци, 49.644 лица се наоѓале во затворите, чиј капацитет е 19.000 затвореници, објави минатата година, InSight Crime. Дополнително 33.000 луѓе беа сместени во привремени објекти со капацитет за само 5.000 луѓе.
Вооружените банди го контролираат животот во многу затвори во Венецуела, а многумина умираат во притвор. Повеќе од 6.600 луѓе загинаа во затворите во земјата помеѓу 1999 и 2015 година, објави “Хјуман рајтс воч”. Минатата година масовна гробница со 15 тела била пронајдена од страна на градежните работници во затворот во државата Гуарико.