Манчестер јунајтед и Арсенал одиграа без победник (1:1) во дербито на 12. коло во Премиерлигата. Мата обезбеди водство за „црвените ѓаволи“ во 73 минута по асистенција на Ерера, Жиру израмни во 89 минута за тимот на Арсенал кој не знае за триумф на „Олд трафорд“ цели 10 години.
Позадоволен од конечниот исход, се разбира, е Арсен Венгер. Замените што Фрацузинот ги направи во второто полувреме директно влијаеа за освоениот бод на „топчиите“. И стрелецот на голот (Жиру) и асистентот (Окслејд Чембрлен) по почнаа мечот од клупата, но минаа доволно време на теренот за израмнување.
Центаршутот на Чембрлен, крај Рашфорд, ја надлета тврдината пред Де Хеа и на Жиру не му беше тешко да ја „закова“ топката во мрежата. Мата постигна прекран гол во 68 минута. Акцијата ја повлече Погба по десната страна, додаде до Ерера кој продолжи кон Мата, а шпанскиот репрезентативец од „прва“ го матира Петр Чех.
Домашните, вреди да се признае, беа подобар ривал од Арсенал денеска иако играа без Златан Ибрахимовиќ. Имаа повеќе од играта, создадоа неколку прилики за гол, успеаја до еден, но не и до втор за потврда на трите бода. Казната ги стигна во саммиот финиш во кој составот од „Емирати“, што се вели, со еден шут на гол остана непоразен.