Катарците сериозно ги сфатија обврските за Светското фудбалско првенство во 2022 година на кое ќе бидат домаќини. Не сакаат ништо да препуштат на случајот, сакаат да избегнат ситуација да финишираат со работите во „пет до 12“ и сакаат да завршат колку што е можно поскоро со обемниот проект за кој ја добија довербата на ФИФА.
Властите во земјата трошат 500 милиони долари за целокупната инфраструктура. Посочената сума не е на месечно или годишно ниво туку неделно.
„Трошиме речиси 500 милиони долари неделно. Така ќе биде се додека не завршиме со работите. Не сакаме да се најдеме во ситуација да уредуваме стадиони, а турнирот да почне и луѓето да пристигнат во нашата земја. Сакаме навреме да го завршиме нашиот дел од обврките. Вкупниот буџет за Светското првенство изнесува 200 милијарди долари“, вели Али Шариф ал Емади, министер за финансии на Катар.
Ал Емади откри дека не се градат само стадиони туку и улици, автопатишта, нов аеродром, болници, железница, хотели, итн.
„Парите се обезбедени иако цената на нафтата падна. Во комлетната инфраструктура вложуваме 200 милијарди долари, но ако се гледаат само стадионите, тогаш Светското првенство во 2022 година нема да биде најскапо“, тој катарскиот министер.
Катар гради 10 стадиони за потребите на мундијалот по пет години. Седум од нив ќе бидат нови од темел, а три ќе минат низ процес за реконструкција и зголемување на капацитетот. Земјата домаќин на СП 2022 е трета во светот според резервите на гас, но има и преку 25 милиони барели нафта во резерва. Двата енергенса чинат 85 отсто од извозните приходи и преку 50 отсто од бруто домашниот производ.
Катарците лани за првпат по последните 15 години забележаа буџетски дефицит на што влијаеше пад на цената на енергијата. Минусот изнесуваше 12 милијарди долари, а за оваа година е одобрен државен буџет со дефицит 7,7 милијарди долари.
