Вештакот Милан Ќосевски, кој денеска даваше исказ на закажаното рочиште за случајот „Ласкарци“, рече дека автобусот на „Дуермо Турс“ имал безбедносни системи за сопирање, но уште воочиле дека контактната табла не е во добра состојба. Притоа истакна дека возилото било технички неисправно и дека главните неправилности се лоцирани во неефикасноста на системот за кочење. Професор на ФЕИТ, истакна дека по наредба на ОЈО, тој и неговите колеги изготвиле вешт наод за сообраќајната несреќа по извршениот увид на патот, на банкините, на локацијата каде што бил автобусот, како и на самата механизација на возилото. Ќосевски додаде дека на автопатот немало траги од кочење на автобусот.
Исказ за случајот „Ласкарци“ даде и сведок, кој бил прв очевидец на настанот. Тој помалку од една минута возел зад автобусот на „Дурмо турс“ и имал намера да го претекне пред да се случи смртоносната несреќа. Тој негови очи се случило излетувањето на автобусот и објасни дека тоа изгледало како тој да врти на лево и како нормално да се исклучува од автопатот, без да се обидува да закочи. Не слушнал никаков звук, ниту забележал стоп-светла и помислил дека возачот добил срцев удар, бидејќи едноставно само завртел в лево.
Судскиот процес го води судијката Диана Груевска Илиевска, а застапник на обвинението е јавниот обвинител Дарко Јакимовски.
За автобуската несреќа се обвинети шест лица. Сопственикот на „Дурмо турс“, Дурмиш Белули, одговорниот за транспорт во фирмата, Ремзи Мифтари и возачот на автобусот Маноел Трифуновски се товарат за сторени тешки дела против безбедноста на луѓето и имотот во сообраќајот, додека тројцата вработени во станицата за технички преглед Игор Ѓорѓиевски, Горан Дуковски и Јане Боварски за соучество во истото дело.