Најмалку 39 луѓе загинаа, меѓу кои 16 се странски државјани, а 69 лица се повредени во нападот на ноќниот клуб Реина во Истанбул. Човек облечен како Дедо Мраз еден час по полноќ, на влезот во клубот најпрво убил еден полицаец, а потоа влегол во ноќниот клуб и пукал во гостите со автоматска пушка, јавуваат медиумите.
Сулејман Сојлу, министерот за внатрешни работи на Турција изјавил дека полицијата уште трага по „терористот“. За турските власти нема сомневање дека станува за уште еден терористички напад. И Васип Сахин, градоначалникот на Истанбул во изјавата за медиумите вели дека станува збор за терористички напад чија цел биле недолжни луѓе кои во клубот го славеле доаѓањето на Новата година.
Во клубот, кој сместен на брегот на Босфор во европскиот дел на Истанбул, имало околу 600 гости. Многумина од луѓето во паниката скокале во водите на Босфор. Во спасувањето учествувале и бротчиња на морнарицата.
Полицијата дошла во клубот многу брзо по нападот, но напаѓачот успеал да избега. За време на новогодишната ноќ, како мерка на безбедност, низ улиците на Истанбул биле распоредени 17.000 полицајци, многумина преправени како Дедо Мраз или како улични продавачи.
Барак Обама,претседателот на САД во заминување беше меѓу првите светски лидери кои изрази сичувство за загубата на невини жртви и на Турција ѝ понуди секаква неопходна помош по овој настан.
Во 2016 година Анкара и Истанбул беа цел на неколку терористички напади за кои одговорноста ја преземаа или ИСИС или курдските бунтовници. Во тие напади загинаа повеќе од 180 луѓе.
https://www.youtube.com/watch?v=6e_vpR-dlJ4