Пратеникот Амди Бајрам, на денешната седница во Собранието, наменета за пратенички прашања, на премиерот Зоран Заев му рече дека никој премиер претходно не се залагал да одговори на неговите барања како што тој го направил тоа.

Бајрам упати низа пофалби за Заев, и покрај тоа што за време на предизборните кампањи, како силен поддржувач на партијата ВМРО-ДПМНЕ, на Заев, во тогашно својство на лидер на опозицијата му порача дека ќе заврши во Шутка. Тоа се случуваше кога Заев ги објавуваше т.н „бомби“.

Но откако стана независен пратеник и ја раскина коалицијата со ВМРО-ДПМНЕ, Амди Бајрам рече дека ќе ги поддржи сите политики на новата власт кои ќе придонесуваат за доброто на сите граѓани на Македонија.

„Многу граѓани има во Република Македонија сиромашни. Таа сиромаштија ја кажувам од аспект на болест која доаѓа до здравство и не можат да се лечат луѓето бидејќи немаат пари. И доаѓа до смртни случаи. Минатата Влада тоа прашање не го реши, оваа Влада верувам дека сака да го реши. Оваа Влада сака да помага на сите, не само на Ромите и верувам дека може да донесе одлука таквите луѓе да се лекуваат бесплатно. Оваа Влада и овој премиер таков е, до сега никој немаше слух“, рече Бајрам.

На ова, Заев му даде подолг одговор охрабрувајќи дека постојат механизми кои граѓаните треба да ги користат за подобрување на своето здравје.

„За жал сиромаштијата ги таргетира сите, без разлика на етникумот, но факт е дека Ромската заедница е најпогодена и најсиромашна. Јас сум убеден дека треба да ги користиме досегашните механизми кои ни се на располагање. Социјално загрозените лица имаат право на бесплатно лекување и треба да ги користат тие можности. Институциите се должни да го почитуваат законот. Не смее да има граѓанин на кој нема да му биде испорачано лекување. Правиме напори до крајот на оваа година да обезбедиме 5.5 милиони евра и со разни заштеди плус, целта е Клиничкиот центар да го споиме, да не одат парите во управни одбори или комисии туку сите овие средства да придонесат кон законот за бесплатно болничко лекување.

Во делот на погреб на лица од семејство кое не може да го организира и плати погребот, согласно законската регулатива, општините се задолжени согласно закон да го направат тоа. Апелирам до граѓаните да го користат ова законско право.

Во делот на лековите, се уште за жал немам обезбедено механизми најсиромашните да можат да го земат лекот. Јас предлагам да се користат сите институции за директно помагање додека не најдеме трајно законско решение. Да се повикаме на солидарност. Колку и да е евтино, за жал некои луѓе не можат да си ги дозволат. А сите градоначалници можат да помогнат во тоа, за да водиме грижа еден за друг.

Министерството за здравство, Фондот и Агенцијата за лекови барам да најдат механизми како за најсиромашните да најдеме решение како тоа да се реши“, рече Заев.

По неговиот одговор, пратеникот Бајрам посочи дека досега не се случило Премиер да одговори на неговите прашања на таков начин.

„За сите да слушнат, вака, гледам дека точно се залагате за народот и многу сум благодарен од вашето излагање и македонскиот народ виде што кажавте. Гледам како одите така ќе бидете подржани од секого“, му рече Бајрам на премиерот Зоран Заев.