Денешниот ден (5 мај) е посветен за одбележување на македонскиот јазик. По тој повод се огласи техничкиот премиер Оливер Спасовски кој порача дека „јазик е света обврска за сите нас“, а по него и лидерот на СДСМ, Зоран Заев кој нагласи дека „македонскиот јазик е еден од клучните кодови на нашата посебност, темел и идентитет“.
Кон одбележувањето на Денот на македонскиот јазик се јавија и од Американската амбасада со видео во кое дел од персоналот говори за искуствата со негово практицирање. Го изучувале од шест месеци до две години во Вашингтон пред да дојдат на фунцкија во Скопје и во видеото говорат за предизвиците, за тоа колку шесто го користат и со какви потешкотии се соочувале при совладувањето.
https://www.facebook.com/USEmbassySkopje/videos/259905825397641
Институтот за македонски јазик „Крсте Мисирков“ (ИМЈ) по повод денешниот ден најави дека електронски ќе објави десет книги за афирмација, негување и за проучување на македонскиот стандарден јазик.
Станува збор за делата „За македонскиот јазик“, книга 11 од Посебните изданија на ИМЈ, објавена во 1978 година под редакција на Тодор Димитровски, на Блаже Конески и на Трајко Стаматоски; Осум зборници (почнувајќи од книга 2) од едицијата „Денови на Благоја Корубин“, основач и главен редактор: Снежана Велковска (најновите зборници ги има на веб-страната на Институтот, а останатите електронски изданија се сè уште недостапни оти се наоѓаат во фаза на подготовка за објавување); Фототипско издание на „Речникот на презимињата кај Македонците“, во два тома (од 1994 и 2001 година) од авторите Марија Коробар-Белчева, Олга Иванова, Маринко Митков и Трајко Стаматоски и под редакција на Трајко Стаматоски (кому на овој начин ИМЈ му го одбележува 95. роденден)