Министерската конференција во рамки на претседавањето на Република Грција со Процесот за соработка на Југоисточна Европа, е можност за нови перспективи и форми на заедничка соработка за зајакнување на безбедноста не само во регионот на ЈИЕ, туку и низ цела Европа, рече министерот за внатрешни работи Оливер Спасовски на маргините на конференцијата. 

-Еден од нашите главни приоритети се заложбите за унапредување и продлабочување на билатералната и оперативната меѓународна соработка на нашето Министерство за внатрешни работи со Министерството за заштита на граѓаните на Република Грција и тоа во повеќе области од заеднички интерес, како што е борбата против трговијата со луѓе и криумчарењето мигранти, трговијата со дрога и справувањето со илегалната миграција. Денешново учество на Министерска конференција во рамки на претседавањето на Република Грција со Процесот за соработка на Југоисточна Европа го искористивме да размениме мислења и ставови во однос на безбедноста на нашите држави и земјите од регионот, што пак, ќе придонесе за поефикасно координирање и спроведување на активностите со останатите земји, градејќи заеднички став за прашања кои се од заемен интерес. Несомнено, безбедноста останува еден од најзначајните параметри за мерење на европската перспектива на земјите од регионот на Југоисточна Европа. Денес, во услови на динамично живеење, кога на безбедноста се гледа и од воен аспект, имајќи ги предвид странските воени закани и новите облици на загрозување на безбедноста, исправени сме пред нималку лесна задача –потреба од редефинирање и зајакнување на регионалната соработка, а во исто време водејќи сметка да не се намали ефикасноста на борбата против организираниот криминал, илегалниот миграциски екстремизам и тероризам и трговијата со луѓе, изјави Спасовски во Атина.

Спасовски е првиот министер кој на официјален настан во Република Грција зборуваше на македонски јазик.