Поднесено е барање до компанијата „Телеграм“ со седиште во Лондон за идентификација на двајцата администратори и на двајцата модератори на групата „Јавна соба“, а иствормено се прават криминалистички контроли на терен, изјави техничкиот министер за внатрешни работи, Наќе Чулев. Дадени се насоки и до инспектори во сите СВР за теренско прибирање на информации за идентификување на лицата кои биле модератори и администратори на групата, но и за сите учесници во групата кои го прекршиле законот „за производство и дистрибуција на детска порнографија“ и „злоупотреба на лични податоци“.
„Сè уште немаме одговор од Телеграм. Сè уште не ни се познати администраторите. Се работи на оперативни активности на терен. Веќе имаме и многу релевантни сознанија за идентификување на дел од луѓето кои ја менаџирале оваа група, но во интерес на истрагата не би одел со конкретни имиња, зошто се е во фаза на истрага“, кажа Чулев.
По добивање на информацијата за „Јавна соба“ на Телеграм, посочи тој, било информирано Основното јавно обвинителство (ОЈО) и истовремено биле собрани сите информации од групата за профилите.
„Се работи за околу 8.000 членови, чиј број опадна во последниот период. Се работи за околу 800 фотографии и видеа, претежно од „Фејсбук“, „Инстаграм“ и интернет, но има и приватни фотографии и видеа“, изјави Чулев.
https://www.facebook.com/359477174168894/videos/1274676792734040
Нагласи дека биле дадени насоки на инспектори да стапат во контакт и згрижат сите жртви и сите кои ќе пријават дека им се злоупотребени лични податоци.
„Досега има два пријавени случаја, но колку што знаеме се работи за злоупотреба на лични податоци, но не и за член 193 за производство и дистрибуција на детска порнографија. Сè уште не е докажана, но ќе се оди во насока на инкриминирање на сторителите“, изјави Чулев.
Прашан дали се повикани некои од лицата посочени во медиумите дека членувале во групата „Јавна соба“, министерот Чулев рече дека колегите веќе работат на тоа. Учесниците во „Јавна соба“, кажа Чулев, користеле многу звучни имиња и полицијата сега врши идентификување дали се тоа навистина личностите за кои се зборува.
„Работат колегите. Пред се ставаме инпут на оние членови кои објавиле компромитирачки материјали, но не и на учесниците. Не може осум илјади луѓе. Не може сите членови да се повикаат, само оние што ги прекршиле законот. Ќе се повикаат најпрво само оние членови кои објавиле компромитирачки материјали“, изјави Чулев.
Во однос на тоа дека веќе се формираат нови групи на други медиуми, Чулев кажа дека ги следат и другите групи кои се формираат и дека ќе излезат со дополнителни информации ако има такво нешто.