Во Белгија не владее страв. Белгијците не се исплашени. Тие се гневни. Гнев насочен кон терористите но и кон владата. Шест Белгијци од десет сметаат дека владата можела да го спречи нападот.
Подлабоката анализа на овие резултати покажува дека се всушност застрашувачки. Затоа што откриваат огромна недоверба кон политичките институции и фрагментирање на општеството околу идентитетските прашања.
А идентитетот како што е познато е една од омилените теми на екстремната десница во Европа.
По нападите во Брисел, плоштадот на Берзата се претвори во меморијал за жртвите на тероризмот, граѓаните палат свеќи, цртаат, носат цвеќиња, пеат…
Спокојот на ова место го растурија 500 хулигани, навивачи на фудбалски клубови. Зад кои се крие белгиската екстремна десница.
Седумдесет проценти Белгијци сметаат дека некои политички партии ќе ја искористат оваа ситуација за да го промовираат говорот на омраза, отрфлањето на муслиманската заедница и креирање на страв кој ќе отвори јаз помеѓу жителите.
Марк Тревидик познат судија од француската анти терористичката ќелија, ова го потврдува и вели дека сме сведоци на еден вид домино ефект. Терористите, вели тој, сакаат да удрат што е можно појако за да Западот се сврти кон мулиманските сограѓани. Тие сакаат државата стане репресивна по што муслиманите ќе им се придружат на терористите. Според овој експерт, ова е стратегија на Исламската држава исто како што беше стратегија на Ал Каеда во 2001 година.
Во сега славниот Моленбек со мнозинско муслиманско население, за вчера беше закажан протест на движењето кое се вика Идентитетска генерација формирано во Франција. Приврзаниците се често гласачи, а некои и членови, на екстремно десниот Национален фронт.
Властите го забранија собирот и порачаа дека нема да толерираат повици за омраза бидејќи во овие тешки времиња потребно е да останеме сите заедно едни до други. Но за Идентитетската генерација собирот е само одложен.
Сите политички партии во Белгија го осудија насилниот упад на 500 хулигани на бриселскиот плоштад. Освен една. Владеачката фламанска националистичка НВА.
Белгиските медиуми уште одамна ги открија сомнителните симпатии кон екстремизмот на некои од нејзините видни членови. Лидерот на НВА кусо изјави дека не треба да му се дава важност на овој настан. Со тоа домино ефектот доби зелено светло.