Нашата тазе влада изгласана без опозицијата се заканува да му го нанесе смртниот удар на Пржино. Но, тоа не го спречува шефот на нашата дипломатија Никола Попоски низ Брисел да раскажува убави приказни. Од кои една наша телевизија заклучи дека Македонија сега се наоѓа на вистинскиот пат кој води во излез од кризата.

Што е и нормално со оглед на изјавата на Попоски кој, откако се сретна со Јоханес Хан, еве што кажа:

“Имаше повеќе чекори кои се случија во изминатите неколку дена кои одат во вистинска насока и тие се охрабрување на некој начин за Европската комисија во правец на задржување на препораката за преговориу за членство во Европската унија”, изјави Попоски.

Сублиминалната порака на Попоски беше дека за Хан е добро што се вратила старата влада и сега комесарот одвај чека и Никола Груевски да се врати за премиер за да почнеме преговори за членство. Можеби комесарот навистина се согласил. Сите добро знаеме дека Хан често им верувал на итроштините смислени во вмровската палата.

Се разбира Попоски ни со еден збор не ја спомна селективната аболиција. Не ја спомна ни кога ни раскажуваше за бриселските средби со неговиот германски колега Штајнмајер и со Американката Нуланд. Не спомна исто така дека утре во Брисел на министерски совет ќе стане збор за македонската криза. И дека нема да бидеме споменати во убаво светло. Не спома ни дека министрите ќе не предупредат дека ова не е вистинскиот пат за излез од кризата.

Штајнмајер и Нуланд на Попоски му ја пренесоа веќе познатата порака на Берлин и Вашингтон: целосно повлекување на аболицијата и непречена работа за специјалните обвинители. Попоски, кој инаку одлично зборува англиски, очигледно не разбрал што му рекле па изјави дека се е во најдобар ред и сега топката е кај опозицијата која бараше избори. Накусо, со оваа изјава Попоски всушност им порача на Штајнмајер и Нуланд дека тие можат да си зборуваат што им душа сака а владата ќе си ја брка тоталната окупација на Македонија.

Со последните потези владеачката партија се обидува во Брисел да го спаси најавеното одземање на препораката веќе во јуни. Таа можеби нема да биде повлечена во јуни но ако не тргнеме по вистинскиот пат тоа ќе се случи во октомври. Ни министерот ни владата не се загрижени. До октомври тие ќе смислат нова итроштина.