Свесноста за органодарителство кај граѓаните е се поголема и тоа е добро за издигнување на здравствениот систем на повисоко ниво, порачаа министерот за здравство, Венко Филипче и националната координаторка за трансплантација во земјава, Маја Мојсова-Мијовска по синоќешното, четврто, успешно пресадување на срце од починат донор во земјава.

– Целиот процес се одвива добро. Ноќеска беше извршена четвртата трансплантација на срце и граѓаните стануваат се посвесни за тоа какво добро дело прават при давање на согласност за донирање на органи од пациенти на кои, за жал, им нема спас. Ова е добар показател, добар знак и упатувам благодарност до сите лекарски тимови кои беа вклучени во операцијата ноќеска, истакна првиот човек на Здравство на попладневата прес-конференција.

Донираното срце од 44-годишната пациентка, која почина од мозочен удар, беше трансплантирано кај 51-годишен пациент, додека двата бубрега ги добија пациенти на возраст од 22, односно 33 години чиј квалитет на живот во голема мера ќе биде подобрен во иднина.

– Успеавме да направиме пет трансплантации од починат донор во оваа година што беше тешка за здравствениот систем од кои четири срца и 10 бубрези, делови од коскено ткиво и во суштина сме на добар пат да бидеме забележани од Европа во однос на бројката и, секако, квалитетот на трансплантациите. Генерално еден здравствен систем се цени по нивото на трансплантација и нивото на здравствениот систем во суштина е препознаен по трансплатација кои се одвиваат затоа што тоа во суштина е највисок дел од здравствениот систем. Но, да кажеме дека без семејствата кои се одлучуваат да даруваат не би можеле сето ова да го направиме, им благодариме од сè срце на тие семејства. Сакаме да изразиме сочувство, но сакаме да знаат дека направиле големо дело, дел од нивните блиски сè уште живее во други пациенти, истакна Мојсова-Мијовска.