На клиниките за Кардиохирургија и Урологија беше извршена трансплантација на срце и бубрези од починат донор. По интензивни подготовки во текот на ноќта, рано утрово беше завршена експлантацијата на срце и бубрези од донорот.
Министерот за здравство, Венко Филипче изјави дека утринава е извршена петтата трансплантација на срце во земјава. Хируршката интервенција е завршена, а пациентот ова деноноќие ќе биде на респираторна машина, а од утре ќе го будат. Ова, вели Филипче, е критична фаза, за која се надева дека нема да има позначајни компликации.
– Навистина ми е мило што со овој чин е спасен човечки живот и е подобрен квалитетот на двајца други пациенти. Сакам најпрво да изразам голема благодарност до семејството на починатата пациентка којашто за жал имаше спонтано крварење во главата, мозокот и практично беше дијагностицирана мозочна смрт. А, нејзиното семејство (сопругот, братот) ја испочитуваа нејзината волја и желба којашто ја искажала уште за време на животот, а тоа е во случај на евентуална смрт да се донираат нејзините органи. Токму благодарение на тој еден навистина чин на човекољубие, беше трансплантирано срцето на 66 – годишен пациент, за којшто немаше друга алтернатива, не беше кандидат за вештачко срце, а неговото срце работеше со капацитет помал од 20%, изјави министерот за здравство Венко Филипче.
Директорот на Клиниката за кардиохирургија Сашко Јовев изјави дека операцијата поминала добро и дека пациентот засега е добар.
– Се надеваме дека така ќе остане и понатаму, рече Јовев.
Министерот Филипче изјави дека се завршени и другите две операции, односно трансплантацијата на бубрези.
– Други двајца 40 – годишни пациенти повеќе нема да одат на хронична дијализа и ќе имаат нормален живот. Сакам да им честитам и навистина сум горд на тимовите коишто ова го направија. Ние во изминатите години навистина во тешки услови, во пандемија со Ковид, интензивно работевме да го зајакнеме здравствениот систем и да го зајакнеме и во други полиња. Благодарение на тоа сега имаме одлично поставен систем. Нашите експерти водени од професорот Јовев, кои во тимот го имаат консултантот од Франкфурт, нашиот кардиохирург Петар Ристески, самостојно ја извршија оваа трансплантација на срце. Учествуваа и повеќе наши кардиохирурзи, анестезиолози… и секако тим предводен од националниот координатор за трансплантација, д-р Мојсова, којашто во тој дел на идентификување на пациенти со мозочна смрт навистина направија се што можеа да направат да се зајакне системот и сега ние ги гледаме тие резултати. Ова се чекори и постапки во нашиот здравствен систем којшто во делот на трансплантацијата не носат на рамниште еднакво со развиените европски земји, вели Филипче.
Според министерот, овие случаи на успешни случаи имаат големо значење во општеството.
– Сведоци сме дека се подига свеста кај граѓаните за органодарителството. Еве и овие чинови на трансплантација значат дека еден живот е спасен на други двајца пациент животот целосно ќе им биде сменет во смисла на тоа да не мораат повеќе да одат на дијализа, туку ќе имаат нормален живот, рече министерот за здравство, Венко Филипче.
За националниот координатор за трансплантација Маја Мојсова Мијовска, нема поблагороден чин од органодарителството.
– Со самите дела што ги правиме и кампањата што ја започнуваме во однос на подигнување на свеста на органодарителството видиме дека фамилиите разбираат за што зборуваме и знаат дека доколку се работи за мозочна смрт, останува дел од нивниот близок кој ќе работи во друго тело, изјави Мојсова-Мијовска.
Од мај 2020 година до сега извршени се експлантации од 7 починати донори, а трансплантирани се 5 срца, 12 бубрега, 1 коскено ткиво.
Срцето на хуманата сограѓанка продолжи да чука во градите на човек кој добива втора шанса за живот