Фондацијата „Заев- едно општество за сите“ во сопственост на поранешниот премиер Зоран Заев од денес започна серијал насловен како „Успешни приказни“. Во серијалот преку видео формат се очекува да продефилираат успешни професионалци од сите сфери со своите приказни за изборот на професијата и како успеале да постигнат успех во нејзиното извршување.
„Серијалот на ‘Успешни приказни’ е моќна порака до сиот македонски народ и до сите граѓани, посебно до младите луѓе дека може да се биде успешен и во нашата држава. Овде е борбата. Овде се случува европеизација на државата. Овде се реформите што треба да ги правиме“, велат од Фондацијата најавувајќи го овој проект.
Првата успешна приказна што ја објави фондацијата е за лекарката Наталија Цоклеска Шунтов која низ современ видео приказ одговара на прашањата поврзани со нејзиниот успех во професијата.
Во најавата на проектот се потенцира и дека во Северна Македонија допрва ќе се крева економскиот стандард на граѓаните и ќе се унапредува животот на народот. „Сите овие предизвици се поголеми дома и имаат поголемо вредносно значење за сите нас како граѓани на оваа држава. Во другите земји од Западна Европа, тоа е веќе постигнато. Затоа треба тука да работиме и вложуваме за наш личен успех, но и за успехот на државата и граѓаните. Со работниот и интелектуалниот капацитет и квалитетот кој го поседуваме може да се напредува и успева и дома. Тука се остава трага. Тука, дома, може да оставите свој личен печат“, велат од Фондацијата „Заев“.