Најмалку 50 лица ги загубија своите животи во пожарите во источна Атика, но стравувањата се дека бројот на жртвите е поголем, бидејќи има голем број пријави за исчезнати во Противпожарната бригада, објави грчката агенција АНА МПА.

Според портпаролката на грчката противпожарна служба бројот на загинатите е 49, додека пак 156 лица се повредени, од кои 11 се во критичка состојба.

Меѓу повредените има 16 деца, но се вон животна опасност.

Во изминатите 24 часа, од 6 часот вчера, до 6 часот утрово, во Грција биле регистрирани 47 пожари. 

Како што јави МИА од Атина, портпаролката на противпожарна служба, Ставрула Малири упати апел до граѓаните да пријават доколку некој од нивните блиски е исчезнат во областите каде што беснееше пожарот.

Сите загинати се во областа помеѓу Рафина и Неа Макри, особено во Мати и Кокино Лиманаки,  во источниот дел на областа Атика. Голем број од нив биле заробени од огнената стихија во домовите или автомобилите или се обиделе да избегаат скокајќи во морето, но се удавиле.

-26 јагленисани тела се пронајдени на едно место во Аргира Акти, Мати, во близина на Неа Макри изјави градоначалникот на Рафина-Пикерми, Евангелос Бурнус за АНА МПА. Според очевидци телата се наоѓаат на 15 метри од морето и најверојатно барале спас во морето, но биле зафатени од пламените јазици.

Според информациите, бројот на повредени е засега е 150.

Меѓународна помош

Димитрис Ѕанакопулос, кусо пред 3 часот утрово, соопшти дека „Атика се соочила со многу тешка ноќ“.

До рано утрово траела акцијата за спасување на луѓето заглавени на плажите во Рафина. Со приватни чамци и бродови, со бродови од редовните линии меѓу Атина и грчките острови, со фрегата и воени бродови од Министерството за одбрана на Грција и на грчката крајбрежна служба, се спасувале граѓани по морски пат.

Според заменикот министер за поморство, Некатариос Санторињос, вкупно 639 лица  биле спасени, додека пак според министерот за одбрана на Грција, воената фрегата „Ели“, спасила72 лица.

Околу 1 часот по полноќ во Атина влегол и последниот автобус со евакуираните 621 деца од летните кампови.

Грција вчера побара меѓународна помош, преку механизмот на ЕУ, позитивно одговориле Шпанија и Кипар, а помош ќе добие и од САД, по упатеното барање од министерот за одбрана.

Грчкиот премиер ја прекина посетата на Босна и Херцеговина и не учествуваше на манифестацијата во Мостар и се врати итно во Атина. Кусо пред полноќ, Алексис Ципрас го посети центарот за справување со кризи на грчката противпожарна служба, каде што со министрите од владата одржаа состанок и беше информиран за ситуацијата  и рече дека е „тешка ноќ за Грција“.

Во гаснењето на пожарите, учествувале над 600 пожарникари со над 400 возила , 7 канадери и 10 хеликоптери. Активни беа 3 жаришта, додека пак утрово, пожарот иако е ставен под контрола, се уште не е целосно изгасен.

И Македонија испраќа помош

Аднан Џаферовски, директорот на Дирекцијата за спасување, утринава изјави дека Македонија ќе испрати два авиони за гаснење на пожарите во Грција. Тој вели дека од синоќа се во постојан контакт со центрите во Грција.

„Од утрово сме на координативна седница, се организираме за пожарите и понудивме помош. Чекаме повретен сигнал. Од утрово се спремни два авиони за гасење пожар. Екипите се спремни. Се очекува секој момент да тргнат“, вели Џаферовски за Макфакс.

Грција го активираше европскиот механизам за цивилна заштита за да добие помош од европските партнери. Досега Шпанија, Кипар и Израел испратиле помош.