МВР во продолжение на акцијата „Ќелија“, ноќеска уапси четири лица од Скопје, а трага по уште три лица осомничени за учеството во редовите на Исламската држава во војните во Сирија и во Ирак.
На прес конференција во МВР, беше соопштено дека со кривичната пријава доставена до Обвинителство за гонење на организиран криминал, опфатени се сите седум лица, кои се на возраст од 23 до 38 години. Петмина се од Скопје, еден од Тетово и едно лице е од Куманово.
„Според сознанијата на МВР, едно лице е во бегство, а другите двајца се уште се наоѓаат во Сирија“, изјави портпаролката во МВР Дејана Недељковиќ.
Извршен е претрес на седум локации и таму се пронајдени и одземени компјутери, мобилни телефони, сим картички, цедиња и истите како доказен материјал ќе бидат предадени на вештачење.
Од страна на Јавното обвинителство за четирите лица кои беа обезбедени доставен е предлог за определување на мерка притвор во траење од 30 дена.
Акцијата „Ќелија“ беше спроведена во август минатата година, кога беа уапсени девет лица – поврзани со регрутација и логистика за странски терористички организации, а подоцна беа пронајдени уште двајца осомничени. Сите 11-мина ја признаа вината и добија затворски казни. Меѓу нив беше и имамот од Тутунсуз џамијата, Реџеп Мемиши кој е осуден на затворска казна од 7 години.