Охрид – градот со најстарото езеро во Европа, милениумска историја, ризница на културно наследство и извонредни природни богатства и убавини. Поради сево ова УНЕСКО го стави македонскиот бисер на листата на светско наследство и го вброи во редот на вкупно 35 заштитени подрачја во светот.
Во 1979 година прво на листата на УНЕСКО беше впишано Охридското Езеро, а следната година и градот како културно наследство. 38 години подоцна, Охрид е под сериозна закана да го загрози имиџот на град под заштита на оваа институција. Ако Скопје 2014 го измени ликот на главниот град, на градот на УНЕСКО му надвиснува проектот Охрид 2020.
Урбанизација или УНЕСКО
Признанието од УНЕСКО за Охрид и за Македонија носи привилегии и гордост, но и одговорност и обврски како за локалната, така и за централната власт.
Охрид влезе во списокот на елитата и со прекрасната природа и со историското богатство. Под мониторинг на УНЕСКО е Охридското Езеро, старото јадро на градот, црквите и сите културно- историски споменици и целата природна околина, каде влегува и Националниот парк Галичица. Токму затоа секоја педа што се гради, секоја цигла, сите урбанистички зафати ги набљудуваат експертите од УНЕСКО.
Поледнете ја репортажата на НОВА ТВ, во која говорат активисти во еколошки здруженија, советници од општина Охрид, туристички работници, директорката на „Завод и музеј – Охрид“. Во сторијата одби да учествува градоначалникот Бакрачески.