„Поништи ги изборите“ е пораката од Студентски пленум до в.д претседателот на СПУКМ, Кирил Спироски по денешните избори кои беа засенети со низа нелигитимности.
Пленумот веднаш по насилното крадење на кутиите со гласачките ливчиња се упати пред седиштетото на СПУКМ, со цел да се соочи со претставниците на Парламентот а воедно ја контактираа и полицијата поради нарушување на јавен ред и мир и како што велат, насилство од страна на претставници на Парламентот.
– Побаравме да се поништат за нелигитимни и невалидни овие избори без разлика што цели две две недели дека целиот процес е луд. На Кирил Спироски му дадовме рок од еден час да ги поништи изборите бидејќи ние ќе останеме тука додека тој не излезе, вели за НОВА, Деа Здравковска од Пленумот.
Според Уранија Пировска од Хелсиншкиот комитет за човекови права пак, загрижувачки е начинот на кој денеска се одвиваа протестите и е само показател за однесувањето на владејачката партија кога се работи за правото на глас.
– Не беше само тајноста повредена на гласањето на студентски избори, туку и сите стандарди. Гласачкото ливче ниту имаше печат ниту бројче а владејачката партија со бруталното крадење на гласачките кутии само уште еднаш ја покажува моќта. Ние (Хелсиншки комитет) ќе поведеме постапка и ќе изготвиме специјален извештај…Не може да стане збор за легитимни избори и за легитимно изборен претседател на СПУКМ. Ова што го видовме е скандал и само уште еднаш покажува каков е манирот на владеење во Македонија…Во Македонија веќе подолго време не можеме да зборуваме за владеење на правото. Можам да гарантирам дека постапката ќе ја водиме до крај но поради нефункционирање на системот не можеме да очекуваме исход, вели Пировска.
А од Студентскиот Парламент пак, во меѓувреме велат единствениот проблем е што се “скандализираат слободните и демократски избори кои се мета на постојана репресивност и скандализирање од одредени политички кругови“.
– Иако во текот на гласањето упативме апел да се почитува правото на глас на студентите, политички мотивираниот Студентски пленум не го испочитува истото и цело време се обидуваше да го наруши изборниот процес.
СПУКМ изразува жалење за обидот на Студентскиот пленум да го наруши гласањето за избор на нов студентски лидер, со што уште еднаш покажа дека е политички мотивиран и не работи за студентите и студентското достоинство.
Денес и покрај сите подметнувања, притисоци и опструкции на изборите од страна на Студентскиот пленум, победи демократијата и победија студентите со што покажаа дека нема потклекнување на студентското движење на разно разни политички иницијативи и обиди за политизација на студентското движење, се вели во соопштението на Студентскиот Парламент.