Најмалку 21 лице го загуби животот, а преку 1.000 се повредени во разорниот земјотрес со јачина од 6,8 степени по Рихтеровата скала што ноќеска го погоди источниот дел на Турција. Тамошните медиуми јавуваат дека под урнатите може да има уште десетици загинати. Потресот се почувствувал и во околните земји Либан, Сирија, Иран, Ерменија и Грузија.
Болниците досега примија околу 1.300 повредени и се проценува дека најмалку 30 жртви се наоѓаат под рушевините. Последиците од земјотерсот најмногу ги почувствуваа жителите на Елазиг и Малатија каде температурите во текот на ноќта изнесуваа осум степени под нулата.
Веднаш е формиран кризен штаб и кон Елазиг се упатени бројни спасувачки екипи.
„Нашите куќи се урнати. Не може да влеземе во нив“, рече 32 годишен маж од градот Сиврис.
Властите издадоа препупредување до граѓаните да не се враќаат во оштетените објекти поради опасност од нови потреси. Епицентарот на земјотресот, според податоците на Европскиот медитеранскки сеизмолошки центар, бил во провинцијата Елазиг.
Турција има долга историја на силни земјотреси. Над 17.000 настрадаа во силниот земјотрес (7,6 степени по Рихтеровата скала) во август во 1999 година во градот Лимит кој се наоѓа на 90 километри југоисточно од Истанбул. Пола милион луѓе тогаш останаа без своите домови.