Два воени авиони СИАИ стормо се судрија денес нешто по 12 часот во близина на Рим. Едниот од авионите паднал во поле кај гратчето Гвидонија, додека вториот се урнал на улица во истото гратче на периферијата на Рим. Двата пилоти загинале, јавува Кориере дела сера.
Областа на несреќата е оградена и спасувачите проверуваат дали во несреќата настрадале и други лица. Во тек е полицискиот увид. Италијанските медиуми јавуваат дека загинале потполковникот Даниеле Чипрано и мајорот Марко Менегело.
Според неофицијалните информации, четири летала полетале од воениот аеродром Гвидонија на тренажен лет над блиското село, а не е јасно како се нашле на небото над градот. Извршувале маневри кога два авиони се допреле и изгубиле контрола.
„Двата пилоти биле во тренажни авиони У-208 и учествуваа во мисија за вежбање. Авионот У-208 е лесен авион кој покрај пилотот може да превезува уште најмногу четири патници и да лета со брзина од најмногу 285 км/ч“, објави италијанската војска.
Другите двајца пилоти успешно слетале и ќе бидат испрашани во следните неколку часа.
„Во име на владата изразувам најдлабоко сочувство на семејствата, нивните колеги и целиот корпус на воздухопловните сили“, кажа италијанската премиерка Џорџа Мелони по несреќата.