Жителите на Сингелиќ и Стајковци утрово се разбудија во амбиент кој воопшто не наликува на 21.век. Низ улиците кал, куќите и подрумите полни со вода, сообраќајот на неколку места е стопиран, механизација и полиција насекаде.
Поради штетата која ја трпат ден по силното невреме кое ги поплави овие села, жителите печашат и по неколку километри за да купат леб и да се снабдат со вода.
Штетите во домаќинствата се огромни. Оштетени се возила, механизацијата со која работат на своите земјишта, огревните дрва, добитокот како и мебелот во домовите во кои живеат.
Од населбата Ченто преку Сингелиќ кон Стајковци, на неколку места полицијата го запира сообраќајот со цел да го редуцира метежот, за да можат багерите да поминат и да расчистуваат местата каде што се најголемите насипи од кал.
– Најсилните дождови беа некаде околу 19 часот. Бевме дома, спасувавме што може да се спаси, но не остана многу. Немаме ни влечки. Јас сум единствената која работи во семејството и после ваква катастрофа не знаеме што да правиме, во паника сме, вели една од соговорничките пред камерата на НОВА, чиј дом целосно е во вода.
Жителите се жалат дека не добиваат помош од никого и дека самите ја вадат водата од поплавените места каде што чувале залихи или разна стока. Некои од нив, велат, грубо пресметано, претрпуваат штета и до 5.000 евра.
Во меѓувреме бројот на загинати од невремето се искачи на 20 лица, а според МВР најголем дел од загинатите се токму од реонот во кој се споени Сингелиќ, Стајковци и Арачиново.
Се уште се водат како исчезнати 4 лица, а на скопските клиники до утрово беа примени 22 повредени.
Во 14 часот Советот на Град Скопје ќе одржи вонредна седница на која ќе се разгледуваат мерки и активности за санирање на штетите. Дополнителна загриженост има од најавата дека за попладнево повторно се очекуваат поројни дождови, како што информираат од Управата за хидрометеролошки работи.