Трагичната смрт на еден продавач на риба во Мароко предизвика бран големи протести во целата земја. Властите уверуваат дека ќе ги казнат виновните за смртта на продавачот.
На погребот на Мухсин Фикри, продавачот на риба, во неделата на 30 пристигнаа илјадници Мароканци во градот Ал-Хосеима на северот на земјата.
https://www.youtube.com/watch?v=DP2qNdy8RGg
Фикри загина во саботата откако инспекцијата му заплени риба која, според правилата, е забранета за лов. Во обид да ја спаси стоката фрлена во камион за отпадоци, Фикри бил потфатен од механизмот на камионот кој ги меле отпадоците и загинал. Неговото загинување било снимено на мобилен телефон и потоа објавено на интернет. Видеото покажува дека Фикри загинал на ужасен начин а на снимките се гледаат главата и една рака закачени на механизмот на камионот. Снимките на интернет беа проследени во повици за протест во целата земја.
Во неделата вечер илјадници луѓе излегоа во центарот на Ал-Хосеима и скандираа: “Криминалци, убијци” , “Не го понижувајте народот”, “Сите се Мухсин” со слики на младиот човек. Но протести имаше и во Казабланка, Маракеш и Рабат, градови во кои ретко се протестира. Протестите во неделата минаа без инциденти.
Мароканските власти покажаа волја да ги казнат одговорните за трагичната смрт на Мухсин. Кралот Мухамед Шести, кој се наоѓа на пат во Танзанија, го испрати својот министер за внатрешни работи Мухамед Хасад да изрази сочувство до семејството.
Но протестите бараат оставка токму од овој министер и го обвинуваат за полициско насилство врз населението.
Може дури да се каже дека властите ги фати паника. Слична случка во Тунис во 2010 година беше фитил за почетокот на Арапската пролет. Еден продавач се самозапали како реакција на конфискацијата на неговата стока од страна на властите. Мароканската верзија на Арапската пролет и протестите се случја на 20 февруари 2011 година токму во градот каде загина продавачот на риба. Градот се наоѓа во провинцијата Риф, позната токму по протестите од Арапската пролет и регион кој често има несогласувања со централната власт.
Истовремено, власта стравува дека протестите можат да донесат проблеми токму сега кога во Маракеш се одржува меѓународната климатска конференција КОП22. Мароканската власт се надева дека токму овој познат настан ќе го поправи имиџот на Мароко на светската сцена.
На протестите имаше транспаренти на кои на меѓународните учесници на КОП22 со црн хумор им се порачуваше: “Добредојдовте на КОП22, ние овде мелеме луѓе”.
Мароканците, како и нивните претходници од Арапската пролет, протестите ги организираат преку социјалните мрежи.