За три дена извозот на маслото за јадење се зголемил за 109 отсто, рече тој
Претседателот на Србија, Александар Вучиќ, синоќа за телевизијата Б92 изјави дека од четврток ќе биде забранет извозот на масло, пченица, пченка и брашно.
– Извозот на пченица и брашно во претходните два дена толку скокна што мораме да го забраниме, изјави тој и додаде дека „Србија ќе има доволно за себе и за регионот“.
Тој рече дека за три дена извозот на маслото за јадење се зголемил за 109 отсто.
Вучиќ појасни дека одлуката на Владата на Србија за начините за намалување и ослободување од царина за одредени стоки е подготвена и нагласи дека ќе се однесува на нафтата од трети земји, доколку Србија ја увезе, за да се овозможи снабдување на пазарот.
Како што изјави во интервјуто за телевизијата Б92, во последните 24 часа имало страшни нарушувања кои ќе имаат последици за се што се случува во Србија, а изјави дека САД решиле да не увезуваат руска нафта и гас и дека слична одлука била донесена и од Велика Британија, а Србија ја чека одлуката на Европската Унија која околу 40 отсто од гасот го добива од Русија.
„Ако одлуката е да се забрани увозот на сите енергенси од Русија, тогаш и ние сме во неволја, немаме каде да го добиеме, ниту нафта, ниту гас не може да „падне од небо“. Бараме од каде би можеле да го набавиме“, рече Вучиќ.
Нафтената индустрија на Србија (НИС) бара увоз на енергенси од трети земји.
Тој посочи дека би сакал Украина и Русија да постигнат договор, но дека не верува дека тоа ќе се случи и оти очекува руската офанзива да продолжи.
Вучиќ нагласи дека „се наоѓаме во најголемата криза од 1945 година“.