Првично, седницата на парламентот требаше да биде затворена и да се презентираат строго доверливи документи за да се расветлат „независните дејствија“ на премиерот Петков насочени кон заобиколување на МНР и Рамковниот став, кој беше усвоен едногласно од сите бугарски партии.
Премиерот Петков испрати предлог со кој практично целосно се ревидира Рамковниот став донесен од Народното собрание и Владата, но тој беше одбиен од МНР, објасни шефицата на бугарската дипломатија Теодора Генчовска на денешната седница на парламентот каде требаше да ги запознае пратениците со „сомнителните“ активности на премиерот Петков во врска со укинувањето на ветото за Македонија.
„На 5 април годинава, советникот за надворешна политика на премиерот го испрати својот предлог- ажурирање на Рамковниот став. Неговата содржина повеќе претпоставува ревизија на бугарската национална позиција“, рече Генчовска.
Таа посочи дека нацртот на овој нов Рамковен став не го вклучува бугарскиот став за „таканаречениот македонски јазик“.
„Барањето европски гаранции за Договорот од 2017 година станува неодржливо. Во пракса, овој проект ги комбинира парцијалните идеи на МНР за имплементација на билатералниот договор, но без јасен механизам за имплементација на договорот. Како МНР одлучив дека не можам да имам никакви забелешки за документ кој е целосно погрешен и кој го отфрливме“, рече министерката во оставка.
Таа нагласи дека додека МНР се обидуваше да преговара и да ги брани позициите, „други оставија впечаток дека Софија е подготвена за отстапки“.
На седницата во парламентот имаше размена на реплики меѓу поранешните коалициски партнери од „Има таков народ“ и „Продолжуваме со промените“. Станислав Балабанов од ИТН изјави дека ќе побараат оставка од претседателот на Народното собрание Никола Минчев поради грубото кршење на законите. Андреј Ѓуров од „Продолжуваме со промените“ рече дека средбата била губење време и не ја постигнала целта бидејќи бугарските граѓани не научиле ништо значајно. Тој повика да се симне тајноста на документите кои требаше да бидат презентирани на денешната седница, но тие не беа ни објавени бидејќи не беше затворена.
Кристијан Вигенин од Бугарската социјалистичка партија ги минимизираше зборовите на Генчовска која тврдеше дека Петков во разговорите со Вархеји ветил дека ќе го укине ветото.
Истовремено премиерот Петков и официјално го изолира МНР од процесот, кој на седница на Советот на министри најави дека сите одлуки ќе одат преку пратениците, извести БГНЕС.
„Министерскиот совет го прифати барањето на Петков сите предлози на француското претседателство во однос на почеток на преговорите на Северна Македонија со ЕУ да бидат директно испратени до собраниската Комисија за надворешна политика, со која раководат луѓе блиски до премиерот“, се вели во написот на новинската агенција.
Според Петков, забележува БГНЕС, тоа е направено „со цел да се подобри отчетноста и координацијата со Националното собрание“. Министерката за надворешни работи Генчовска во Собранието призна дека „не била запознаена со овој документ што денеска го достави премиерот“, се додава во написот.
Петков, пак, оцени дека темата Северна Македонија се користи за да се одвлече вниманието на јавноста.