Според градоначалникот на Скопје, Коце Трајановски, градската плажа „Камени мост“ е успешен проект на градот, на која имало многу посетители и била функционална, но државниот објект „Панорамско тркало“ во моментов бил приоритет и затоа плажата е срушена.
Сепак како што рече денеска Трајановски на прес-конференција на која даде отчет за сработеното на ниво на Скопје, истата пак ќе се реконструира кога ќе заврши Панорамското тркало и новиот мост кој се гради од едната страна на Вардар до другата.
„Плажата профункционира, ако не сте биле тоа е ваш проблем. Има милион луѓе кои биле на таа плажа и уживале во неа. Тоа што сега се прави многу поголем, позначаен, државен проект во Панорамското тркало, е позначаен од плажата и ние планираме, делот од плажата кој нема да биде зафатен од мостот, пак да ја ставиме во функција“, изјави Трајановски на прашање на НОВА.
Тој дополни дека неговата идеја е граѓаните да уживаат на таа плажа гледајќи кон плоштадот Македонија и кон центарот на градот, бидејќи истата и претходно многу добро работела.
Град Скопје за изведбата на двете плажи, едната кај Камени мост и другата плажа во непосредна близина на градскиот стадион издвои околу 15 милиони денари, од кои за „Камени мост“ беа потрошени околу 8 милиони денари, а беше пуштена во употреба пред пет години.
Зборувајќи за успесите на градот Скопје во неговите два мандати, Трајановски исто така по новинарско прашање, се осврна и на дополнителните 50.000 евра кои неодамна од градската каса беа наменети за непредвидени трошоци за доградба на плоштадот ВМРО пред седиштето на неговата матична партија ВМРО-ДПМНЕ.
„Со оглед на тоа во градежништвото не може сите работи да се предвидат, како и за други објекти така и за плоштадот ВМРО беа наменети средства од градската каса. Мислам дека ова е последно плаќање, но за многу проекти ова претходно се правело“, рече Трајановски.
Прашан за тоа дали воопшто на главниот град му бил потребен барокот и како тој гледа на објектите од проектот „Скопје 2017“, градоначалникот одговори дека критиките упатени кон него се должат на тоа што многумина на градот гледаат само од земјотресот наваму.
„Не треба да го сметаме Скопје само од земјотресот наваму. Скопје и пред земјотресот беше со своја архитектура. Во Музејот на градот Скопје може да ги видете градбите пред и по земјотресот и може да се види дали тие имаат сличност. Градоначалникот на Љубљана се интересираше за ова прашање исто така, но и таму градбите се правеа во истиот стил каква што била пред земјотресот (во 1895 година)“, напомена тој.
Прашан дали ќе се кандидира за трет мандат како татко на главниот град, Трајановски одговори дека е прерано да се зборува на таа тема.