Плоштадот ВМРО кој се наоѓа пред зградата на партијата ВМРО-ДПМНЕ „изеде“ уште 50.000 евра од скопјани. Градската власт склучи нов договор без тендер со фирмата „Урбан инвест“ од Кавадарци на име непредвидени работи. Со тоа сумата за изградба на плоштадот во дворот на ВМРО-ДПМНЕ се приближува до 2.000.000 евра.
Плоштадот ВМРО почна да се гради во 2014 година со пари од Градот Скопје. Изведувач на градежните работи е фирмата „Урбан инвест“, а досега со неа се склучени неколку договори. За изградба на плоштадот, за изградба на пристапна улица и за осветлување на улицата.
Плоштадот ВМРО е дел од проектот Скопје 2014 кој почна да се гради во време на владеењето на ВМРО-ДПМНЕ на чело со Никола Груевски, но и натаму постојано се склучуваат нови договори за доизградба или непредвидени работи на објектите.
Фирмата „Урбан Инвест“ е меѓу топ 5-те фирми кои добиваат тендери од Град Скопје.
Плоштадот ВМРО предвидува фонтана и столб со релјефи со ликови и настани од историјата на организацијата. Идејното решение е на скулпторката Елена Дуковска која ја доби првата награда на конкурсот на Град Скопје. На конкурсот што го распиша Градот во ноември 2014 година за ова спомен-обележје, пристигнале три труда на уметници. Сите три ѝ биле изложени цели два часа на увид на јавноста на 29 декември, но како што соопштија од Градот, „во предвидениот временски рок од 10:00 часот до 12:00 часот, не се појавил ниту еден субјект и Одборот го затворил Јавното излагање“.