Утрово реката Вардар се прелеа од коритото во делот на скејт-паркот во Скопје. Екипи на Штабот за заштита и спасување извршиле увид на состојбата на теренот и утврдиле три критични точки на потегот од скејт-паркот до мостот „Слобода“ кај „Холидеј ин“, потоа под зградата на ПИОМ во општина Аеродром и во Долно Лисиче, каде завршува регулацијата на реката Вардар, соопшти на прес конференција Емил Дуровиќ, началник на Штабот.
Тој рече дека нема место за паника и дека Градот Скопје е подготвен да се справи со можните излевања на Вардар. Најави 24 часовни дежурства на екипи на Штабот за заштита и спасување на Град Скопје во соработка со Регионалниот центар за управување со кризи.
Според Дуровиќ се подготвуваат околу 10 илјади вреќи со песок, што најбрзо ќе почне да се поставуваат на критичните точки, бидејќи во текот на ноќта се очекуваат уште поинтензивни врнежи.
Тој информира дека работниците од јавните градски претпријатија со механизација веќе се на терен и го санираат насипот меѓу Горно и Долно Лисиче, кај железничкиот мост, што пред неколку години го кренаа екипите на „Улици и патишта“, а во меѓувреме беше уништен од несовесни граѓани во должина од 200 метри.
Подготвени се и пумпи за исцрпување вода, четири големи пумпи со капацитет од 8.700 литри во минута, како и 40-ина помали пумпи кои ќе се стават во функција доколку има потреба.
