Нов гол на Илија Несторовски или „Несторгол“ како популарно го нарекуваат навивачите на Палермо. Репрезентативецот на Македонија со четврта клупска реализација во Серија А во оваа сезона, прва на домашен терен, што а крајот не беше доволна за бод(ови) на неговата екипа во последниот меч од 10. коло. Удинезе ги однесе трите бода од Сицилија по триумфот со 3:1 вечерва на „Ренцо Барбера“.
Несторовски ја погоди мрежата на гостите уште во 10 минута. Доби топката на средината на теренот и сам поведе контра иако против себе навлекуваше неколку противнички играчи. Претрча 40-тина метри, влезе во казнениот простор, избегна лизгачки старт за негово блокирање и покрај четворица фудбалери на Удинезе го совлада голманот Карнезис.
Тоа, сепак, не беше доволно за екипата да остане непоразена и да почне полека да ја напушта опасната зона. Теро во 36 минута и на двапати Фофана (74′ и 79′) реализираа за комплетен пресврт и конечна радост на екипата од „Фриули“. Со овој пораз, Палермо падна на претппоследната позиција на табелата во Серија А со само шест бода од 10 меча и со само едно реми во последните пет настапи. Во наредното коло ќе гостува на Сардинија на тимот на Калјари.
Несторовски досега постигнуваше голови на три гостувања на сицилијанците. Дебитантскиот го забележа во ремито (1:1) кај Кротоне, потоа реализира во Бергамо за триумф против Аталанта и во нерешените 1:1 во Џенова со Сампдорија. Покрај четирите во дресот на Палермо, Несторовски има и два за репрезентацијата на Македонија, по еден против Израел и Италија во квалификацииите за СП 2018 на почетокот на овој месец.
https://www.youtube.com/watch?v=u9s552ezGxE