Преговорите за составот на новата влада се очекува да продолжат денеска. Лидерот на СДСМ, Зоран Заев вчера имаше средба со лидерот на ДУИ, Али Ахмети, а викендов се очекува тој да седне на маса со раководството на БЕСА и на Алијансата за Албанците.
По средбата, од СДСМ соопштија дека темите за кои се разговарало на средбата меѓу Заев и Ахмети биле принципите на соработка, реформската Влада и интеграциите во Европската унија и во НАТО.
„Во наредниот период ќе се интензивираат динамиката и разговорите помеѓу двете партии, вклучително и со партиите што дадоа поддршка за состав на новата Влада на Република Македонија, по што ќе се премине на конкретните решенија за ресорните министерства“, информираа од СДСМ.
Крајниот рок за Заев да го соопшти составот на новата влада е 6 јуни. Според Уставот новиот мандатар има 20 дена за екипирање на новиот владин состав, сепак, Заев по доделувањето на мандатот посочи дека очекува преговорите за формирање на владиниот кабинет да завршат многу порано од предвидениот рок, односно за десетина дена.