Енди Мареј го препушти вимблдонскиот трон и, многу веројатно, врвот на АТП листата. Британецот е елиминиран во четврт-финалето на гренслемот во Лондон, а за најголемото изненадување на машкиот дел од турнирот се погрижи Сем Квери кој славеше во пет сета со 3:6, 6:4, 6:7, 6:1, 6:1.
Американецот постојано му дишеше во врат на најдобриот светски рекет, беше упорен и во ниту еден момент не застрани од намерата. Имаше негатива од 2:1 во сетови, но четвртиот го доби со убедливи 6:1 како нагласена потврда дека е во голем налет, дека доминира и на добар пат е да оствари голема победа.
Тоа и се случи во решавачкиот петти сет. Ја задржа агресивноста од претходниот период, направи брејк во раната фаза што потоа го потврди за нови 6:1 и за конечен триумф.
Негов противник во полуфиналето ќе биде Хрватот Марин Чилиќ кој, исто така, во пет сета го порази ветеранот Жил Милер од Луксембург со 3:6, 7:6, 7:5, 5:7, 6:1.
Поразот на Мареј, сепак, не го искористи Новак Ѓоковиќ. Се распрснаа соништата на српскиот тенисер за можно скоро враќање на лидерската позиција на АТП листата, откако беше принуден да го предаде мечот на Томаш Бердих поради болки во пределот на десниот лакт. Меѓу првиот и вториот сет побара и медицински тајм-аут, но ниту интервенцијата на лекарите не ја амортизира силната непријатност што ја чувствуваше.
Бердих го доби првиот сет со 7:6, поведе со 2:0 во вториот меѓутоа Ѓоковиќ беше принуден предвреме да подаде рака и да му посака среќа во мечот за финале.
Последен полуфиналист на Вимблдон е Роџер Федерер кој во три сета (6:4, 6:2, 7:6) го совлада Милош Раониќ.
Вимблдон/четврт-финале (м)
Резултати
Квери (24., САД) – Мареј (1., В. Британија) 3:6, 6:4, 6:7, 6:1, 6:1
Федерер (3., Швајцарија) – Раониќ (6, Канада) 6:4, 6:2, 7:6
Чилиќ (7., Хрватска) – Милер (16., Луксембург) 3:6, 7:6, 7:5, 5:7, 6:1
Бердих (11., Чешка) – Ѓоковиќ (2., Србија) 7:6, 2:0 – Ѓоковиќ го предаде мечот