Владата денеска изрази жалење за непријатната ситуација до која дојде вчера за време на одржувањето на лидерската средба, кога на фоторепортерите не им бил дозволен пристап. Во соопштението се наведува дека ваквата ситуација настанала поради „спроведување на безбедносните насоки“.

-Владата на Република Македонија со посебно внимание ги прифати и ги анализираше реакциите на претставниците на медиумите што беа предизвикани од настаните за време на подготовките за известување од лидерската средба што се одржа вчера во Клубот на пратениците. Водена од врвниот принцип да го почитува и да го овозможува правото на медиумите за непречено, одговорно и професионално известување од настаните од посебен интерес за јавноста и граѓаните, претставниците на Владата на РМ на вчерашниот настан обезбедија услови за работа на новинарите и новинарските екипи, соодветно на стандардите за вакви настани и насоките кои ги има добиено од безбедносните институции. Поведени од начелото дека треба да бидат обезбедени еднакви услови за сите претставници на медиумите без исклучок, како и заради безбедносни проценки направени од професионалните безбедносни служби, жалиме што не постоеше можност да се направат исклучоци од однапред утврдените и обезбедени услови за работа на сите медиумски екипи, се вели во соопштението. 

На крајот, од Владата истакнуваат дека и натаму остануваат посветени на примената на единствен и еднаков пристап кон сите медиуми кога станува збор за јавни настани од интерес на граѓаните.

Фоторепортерите и снимателите кои денеска се присутни во Клубот на пратениците за следење на лидерската средба, во договор со претставници на Владата, добија можност да ги фотографираат лидерите на политичките партии како што правеа и претходно.

Фото: Фејсбук

Снимателите и фоторепортерите претходно имаа кус брифинг со советникот на премиерот за односи со јавност Маријан Забрчанец и портпаролот Миле Бошњаковски на кој се обидоа да ги надминат вчерашните несогласувања кога неколкумина фоторепортери си заминаа од лидерската средба незадоволни од образложението дека поради безбедносни причини не може да ги фотографираат лидерите на политичките партии на влезот на објектот, додека излегуваа од  возилата.

По кусиот брифинг претставниците на Владата им дозволија на медиумските работници да си ја вршат својата работа онака како што тоа го правеле и претходно.

Вчерашниот случај го осудија Самостојниот синдикат на новинарите на Македонија и Советот за етика во медиумите, кои истакнаа дека работата на новинарите, фоторепортерите и другите медиумски работници мора да биде ослободена од какви било закани и притисоци, а државата во согласност со член 10 од Европската конвенција за човекови права е одговорна за преземање на сите активни мерки со цел да се создаде и одржува поволна клима за слобода на изразување.