Владата ги намалила парите за превентивните програми на Институтот за јавно здравје од 35 на 13 милиони денари. Тоа е една од главните причини за тешката финансиска ситуација и колапсот, тврдат во оваа институција. Откако НОВА ја објави сторијата дека сметката е блокирана о д извршители и празна, вработените втор месец не земале плата, а не можат да ги извршуваат ниту тековните обврски(не можат да стават ниту гориво во службените возила) никој од надлежните не превземал ништо. Во Институтот ситуацијата е непроменета, а незадоволство кај вработените се зголемува. Директорот Шабан Мемемети вели дека нема никаков одговор на неговото писмо ниту од Владата, ниту од Министерството за здравство.
„ Чекаме да видиме дали ќе се превземе нешто. Средставата за превентивните програми се драстично намалени во последните три години така што иако Фондот и Министерството ги исплаќаат навреме парите сепак, во последните три години овие средства се драстично намалени“, изјави за НОВА директорот Шабан Мемети.
Иако средствата за програмите ги добиваат навремено од Фондот и Министерството за здравство, во Институтот велат дека тие не се доволни поради зголемениот обем на работа.
Освен проблемот со намалените средства од Владата, тој вели дека нелојалната конкуренција исто така влијаела на тешката финансиска состојба во која се нашол Институтот. Контролите и испитувањата на храната ги врши Агенцијата за храна, а се појавија и приватни лаборатории за одредени испитувања, како за зрачење на пример.
Згора на се новите 54 вработувања дополнително ќе го оптоварат буџетот на Институтот, велат од таму. Вработувањата се однесуваат на оние кои работеле со договор на дело, а според Законот за трансформација на Владата тие се примаат во три етапи во текот на годината.
„Тоа е големо оптоварување, за само една година вкупно 54 нови вработувања“, рече Мемети.
Сепак, нејасно е зошто тој како менаџер прифатил толку вработувања иако знаел дека ќе го оптоварат буџетот на институцијата.
Институтот за јавно здравје е прва линија на фронтот во остварување на системот на превентивна и медицинска заштита и управува со приоритетните проблеми, превзема решенија на национално, регионално и локално ниво.
Неговата улога е во унапредување на здравјето на граѓаните преку научно базирани сознанија , како и во одржливо јавно здравствени политики.
Таму се вршат превентивни и санитарни прегледи, хемиски и лабораториски испитувања,ХИВ/СИДА и други заразни болести.
Институтот е во загуба од половина милион евра. Во моментот оваа институција вкупно должи 1 милион и 790 илјади евра. Сметката со извршител ја блокирала фирмата „Биотек“ на кои за реагенси Институтот им должел 260 000 евра. Институтот пак, од разни должници треба да наплати еден и пол милион евра.
Ситуацијата е алармантна бидејќи залихите од реагенси се трошат, а за еден месец таму нема да можат да се вршат анализи и превентивни проверки.