Предлог-измените што Владата ги достави до Собранието, а се однесуваат на Изборниот Законик се веќе ставени на дневен ред на денешната собраниска седница.
НОВА ТВ имаше увид во предлог-измените кои Владата до Собранието ги испрати со европско знаменце.
Според предложените измени, освен што се предлага да се смени потребното мнозинство за избор на членови на ДИК, во измените што Владата предлага да се донесат по скратена постапка, се предлага и нов начин на кандидирање на членовите на ДИК.
Според предлогот во Изборниот законик се брише точката која предвидува собраниската Комисија за именување да подготви предлог-листа на кандидати а кандидатите да се предлагаат директно на собраниска седница.
Во предлог-измените пишува дека на собраниска седница опозицијата треба да предложи претседател и двајца членови на ДИК а власта потпретседател и тројца членови на Државната изборна комисија.
Пратениците на ВМРО-ДПМНЕ бурно реагираа на почетокот на денешната Собраниска седница по информацијата на НОВА ТВ дека Владата доставила предлог-измени на Изборниот законик.
„Никогаш не се менувал Изборен Законик без консултации со опозицијата. Власта само што го испрати еврокомесарот Јоханес Хан до Собранието достави вакви „европски“ и „демократски“ измени на законот“, рече Данев од собраниската говорница.
Претходно, НОВА ТВ објави дека Владата до Собранието денеска достави измени на Изборниот Законик кои треба да се изгласаат по скратена постапка.
Со измените се предлага изборот на членови на Државната изборна комисија (ДИК) да се избира со просто мнозинство од 61 пратеник, а не со двотретинско мнозинство како што беше до сега.
Измените на изборниот Законик стигнуваат откако ВМРО-ДПМНЕ го услови изборот на членови на ДИК со усвојување на Законот за финансирање на политичките партии како и со формирање на техничка Влада.
Поради ова формирањето на ДИК за сега е блокирано. Рокот за избор на членови на оваа Комисија истече пред две недели.
Формирањето на ДИК е клучно затоа што ДИК е надлежната институција која што треба да го спроведе референдумот најавен за крајот на септември или почетокот на октомври 2018 година.
Како што најави денеска премиерот Зоран Заев утре треба да се доржи лидерска средба на која што главна тема ќе биде прашањето за референдумот.
Во декември минатата година осуммина од девет членови на ДИК поднесоа оставки откако во јавноста беше обелоденето дека си поделиле високи надоместоци за својата работа за време на локалните избори во октомври 2017 година и последните неколку изборни циклуси.