Министерството за надворешни работи денеска на седница на Владата ќе достави предлог за затворање на Почесниот конзулат на Република Македонија во Кралството Шпанија, со седиште во Барселона и предлог за отповикување на почесниот конзул на Република Македонија во Кралството Шпанија, со седиште во Барселона, соопшти владината прес служба.
Оваа функција ја извршува Марио Деус, според достапните информации во јавноста стоматолог од Барселона и сопственик на уште една приватна фирма.
Јавноста за него дозна во април годинава, кога во шпанските и во други странски медиуми се појави информација дека тој е уапсен во Јужна Африка, осомничен за убиство на неговите две деца, тригодишни близнаци.
Поранешната сопруга на Деус, Швеѓанката Џулиа Енгелхорн ги пронашла телата на близнаците Максимо и Октавија, во изнајмена вила во близина на Кејп Таун.
Полицијата соопшти дека Деус, кога ја забележал својата поранешна сопруга во вилата, побегнал со нејзиното возило, но подоцна бил уапсен во предградие.
Деус се соочува со две обвиненија за убиство и едно за кражба на моторно возило.
Следниот ден, кога требаше да се појави на рочиштето, медиумите објавија информација дека тој пробал да се самоубие. Оттогаш во јавноста нема информации за него.
Марио Сезар Деус според објавата во Службен весник, за почесен конзул на Македонија во Барселона е назначен на 6 декември 2012 година, а решението го потпишал тогашниот вицепремиер Владимир Пешевски.
Македонското МНР во април соопшти дека ќе почека потврда од шпанските власти на информациите за наводното апсење на македонскиот почесен конзул во Барселона, пред да ги разгледа опциите за одземање или задржување на неговиот статус.
Функцијата почесен конзул во Шпанија е поинаква од конзул од кариера, која ја извршуваат дипломати. Почесните конзули најчесто се успешни бизнисмени. Тие ја претставуваат земјата, во случајов Македонија, онаму каде таа има мало присуство или влијание, но има добри контакти со властите и бизнисмените во земјата каде што ја врши функцијата.