Кампањата за референдумот ќе биде информативна и ќе ја финансираат министерствата со заштеди од своите буџети. Средствата ќе се повлечат од ставките за репрезентации на министрите и други ставки, каде што има заштеди. Во наредните три дена министерствата до Министерството за финансии треба да достават информација колку средства може да дадат.
-Кампањата ќе биде информативна. Сите граѓани ќе ги инфорираме за придобивките на Договорот со Грција. Оценуваме дека референдумското прашање е многу важно за иднината на Македонија и дека на овој начин отвораме пат за европска Македонија – изјави денеска владиниот портпарол, Муамет Хоџа.
Колку пари ќе се дадат за кампањата како што рече Хоџа, не се знае, бидејќи дополнително ќе утврдува план и програма. Откако ќе им кажат министерствата колку пари може да дадат, Владата ќе каже колку ќе чини кампањата.
До сега, рече тој, за содржините пласирани на социјалните мрежи се потрошени само 100 евра од државниот буџет.