Портпаролот на Владата, Миле Бошњаковски денеска на прес-конференција информираше дека Владата од Министерството за внатрешни работи побарала истрага за неколку случаи во за тендери, набавки и договори за кои според Бошњаковски постоеле индиции дека со нив е направена штетата на буџетот на државата.
Бошњаковски рече дека откако бил распишен тендер за јавни набавки за фирми кои ќе вршат резервации на авиобилети биле склучени рамковни спогодби со повеќе компании со цел да се избере најповолната.
„Тоа што е утврдено е дека одговорните лица во Службата за општи и заеднички работи по тендерот и рамковните договори доставувале барање за понуди само до еден оператор, а не до сите како што биле обврзани со рамковните договори. Сметаме дека со ова се направила штета на државниот буџет“.
Бошњаковски рече дека истрага е побарана и за „сомнителни набавки во АД за стопанисување со станбен и деловен простор за договори склучени со фирмата „Атриум“.
„Влада достави и барање за мислење до државното правобранителство во врска со договорите за ангажирање на Александар Никовски, Џорџ Р.Пери како и Јехшуа Шуки Глајтаман кои биле надворешни соработници на Никола Груевски“, рече Бошњаковски.