Владата предлага измените во Собранието на законите потребни за побрза и поевтина изградба на автопатите од коридорите 8 и 10 да се носат со европско знаменце. Тоа значи побрза процедура и скратување на времето за дискусии во парламентот.
На денешната седница Владата донесе нови пет предог-закони за коридорите 8 и 10д кои ќе бидат доставени до Собранието со европско знаме. Како што соопшти првиот вицепремиер и министер за политички систем и односи меѓу заедниците, Артан Груби, целта на новите законски решенија е побрза и поевтина изградба на коридорите.
Од пратениците сега зависи, рече Груби, дали изградбата на коридорите ќе биде побрза и поевтина или побрза и поскапа.
Тој воедно ја повика опозицијата да прекине со блокадите на законските решенија затоа што со тоа, рече Груби, поради дневно-политичка агенда се ставаат во заложништво 150 милиони евра од граѓаните и се загрозуваат националните стратегиски проекти.
„Увидувајќи ја очигледната блокада и заложништвото на законите од опозицијата и имајќи ги предвид интересите на граѓаните, Владата денеска усвои пет предлог-закони кои ќе ги достави до пратениците. Со оглед дека ЕУ го додаде на мапата коридори и Коридорот 8 и со оглед на неговото геостратешко значење, заедно со коридорот 10д, како и поради тоа што долго во јавноста се води дебата, одлучивме законите да се предложат со европско знаме“, рече Груби.