Владата денеска распиша оглас за финансиска поддршка на здруженија и фондации во вредност од 50 милиони денари или 800.000 евра.
Со овие пари, пишува во огласот објавен во дневен весник, ќе бидат поддржани програмски активности преку грантови кои се поделени во две категории.
Грантови во висина од 30.000 до 50.000 евра или вкупно 600.000 евра ќе бидат доделени за следниве цели:
Борба против корупцијата, владеење на правото, демократија, човекови права, добро владеење, социјална кохезија и локална самоуправа.
Проекти од областа на здравството и здравиот начин на живот
Економски развој, одржлив развој, рурален развој, култура и традиции
Млади, семејство и семејни вредности
Евроинтеграции
Област на нови технологии, социјални медии, нови медиуми и ИТ технологии
Помали грантови од 5.000 до 10.000 евра или вкупно 213.000 евра ќе им бидат дадени на здруженија кои ќе понудат програми од областа на економијата, интеграциите на Македонија во ЕУ и НАТО, владеење на правото и образование.
Огласот доаѓа само три месеци откако поранешниот премиер, Никола Груевски, во својот говор по изборите на 11 декември пред Државната изборна комисија во ноќта на „долгите ножеви“ најави десороизација на невладиниот сектор.
„Ќе се бориме за десороизација на Република Македонија и јакнење на независен граѓански сектор кој нема да биде под ничија контрола. Ќе се пристапи кон регулирање на областа на финансирање на фондациите и невладините организации по теркот на најнапредните демократии во светот“, рече Груевски.
Во исто време институциите (УЈП и Финансиската полиција) кои се уште се под контрола на ВМРО-ДПМНЕ, во 30-тина невладини организации веќе два месеца го проверуваат нивното финансиско работење и трансакции од агенцијата за меѓународен развој на САД, USAID.
Владата на чело со премиерот Емил Димитриев е само техничка или преодна влада, чиј мандат треба да трае само до формирањето на нова влада.
Денешниот оглас доаѓа во момент кога земјата се наоѓа во тешка политичка и институционална криза, а јавниот долг секојдневно расте.