Денес, во Собранието на Република Северна Македонија, сведочевме на уште еден чин на отуѓеност на владејачкото мнозинство од реалноста во која живеат граѓаните. Наместо да донесат одлука што директно ќе го олесни товарот врз семејните буџети, пратениците од владејачката коалиција одбија да ги поддржат измените и дополнувањата на Законот за ДДВ, со кои предложивме намалување на ДДВ-то за електричната енергија од 18% на 5% и укинување на ДДВ-то за основните прехранбени производи, вели Фатмир Битиќи.
Тој додаде дека со предложените измени и дополнувања на Законот за ДДВ биле предвидени одржливи решенија. Намалувањето на ДДВ-то за струјата ќе значело 13% пониски сметки за над 600 илјади домаќинства. За сметка од 3.000 денари, граѓаните ќе заштеделе 400 денари месечно, а за повисоките сметки заштедата ќе била уште поголема.
Ветуваа повисоки плати, но граѓаните денес купуваат помалку со истите приходи. Се ветуваше енергетска независност, а ние увезуваме повеќе струја. Се ветуваше подобар живот, а денес едно семејство треба да издвои 2,9 минимални плати за да ја покрие потрошувачката кошница од 63.773 денари.
Денешното гласање во Собранието покажа дека владејачкото мнозинство нема политички сензибилитет за социјална правда и економска рационалност, не ги интересира дали граѓаните ќе плаќаат повисоки сметки за струја, дали храната ќе продолжи да поскапува, дали семејните буџети ќе продолжат да се празнат, рече Битиќи.
Тој напомена дека СДСМ ќе продолжи да се бори за системски решенија за замрзнување на цените на основните производи, за фиксни маржи, за итна примена на Законот за нефер трговски практики, за поевтин „зелен картон“ и за зголемување на платите преку замрзнување на придонесите.