Доколку се отстранат пречките во предложениот Закон за одбрана, истиот би можел да се донесе веднаш, велат од ВМРО-ДПМНЕ како одговор на апелот на министерката за одбрана, Радмила Шекеринска за одговорен пристап за членството во НАТО. Како што кажа, тоа особено се однесува на опозицијата која според неа „до ден денеска молчи на темата“.
„Во Законот се вметнати одредби што воопшто не се дел од оние стандардите на НАТО што се неопходни како дел од усогласувањето во делот на Армијата“, изјави портпаролот Наум Стоилковски, портпаролот на ВМРО-ДПМНЕ, за НоваТВ.
На прашањето на што конкретно се однесуваат пречките, тој само накусо рече дека за тоа е „добро информирана министерката Шекеринска на трите средби што ги имавме“.
Наспроти тврдењата на Стоилковски, Шекеринска вели дека опозицијата не кажала ниту еден збор против законот, не дала ниту еден амандман и ги повика „да престанат со теоретизирање за НАТО и користење за партиски злоупотреби туку да направат нешто што го должиме на граѓаните“. Од ВМРО-ДПМНЕ и натаму остануваат на ставот за ратификација на Протоколот за членство во Алијансата со одложено дејство.
„Го наведовме примерот од Црна Гора и нема зошто да се бега, а ниту пак државата нешто ќе загуби“, порачаа од ВМРО.
Шекеринска денеска рече дека од шпанските колеги добила уверување оти ратификцијата на Протоколот во Мадрид ќе се случи многу брзо по формирање на шпанската Влада и дека процесот ќе финишира на почетокот од 2020 година. Барањето на ВМРО-ДПМНЕ за ратификација на Протоколот за НАТО во нашето Собрание, без да се сочека ратификацијата од Мадрид, според неа, е партиска злоупотреба на темата.
„Тоа ќе ни даде шанса нашиот парламент да не ратификува на жими мајка туку онака како што треба откако сите 29 земји членки тоа го направиле. Во оваа држава многу често ни се случило да мислиме дека сме ја завршиле работата и тоа да не се случи. Затоа луѓето се загрижени. Овој пат сакаме да чекориме на цврсто и затоа сметаме дека апсолутно ова е само злоупотреба и обид една извонредно добра вест да се покрие со 1.001 дилема. На 11 декември, Парламентот го има вистинскиот начин и вистинскиот инструмент како да покаже дека се сите обединети околу НАТО членството. Ратификацијата ќе се случи многу брзо“, изјави Шекеринска.