Лидерот на ВМРО-ДПМНЕ, Никола Груевски придружуван од Владимир Ѓорчев, Александар Николоски и Никола Попоски, денеска се сретнал со амбасадорката на ОБСЕ Нина Соумалаинен, соопштија од ВМРО-ДПМНЕ.
Како што пишува во соопштението на партијата, на средбата Суомалаинен го презентираше извештајот за активностите на ОБСЕ во земјата. Во однос на политичките односи и ситуација, амбасадорката посочи дека Мисијата на ОБСЕ не зазема страна и не се во позиција да промовираат никакви политички опции претставени преку партиите.
ВМРО-ДПМНЕ потенцирале дека состојбата во Република Македонија е зрела за одржување на нови предвремени парламентарни избори поради тесното мнозинство кое би било направено.
Амбасадорката ги прашала претставниците на ВМРО-ДПМНЕ дали за нив ќе биде прифатлива влада формирана од СДСМ.
Од партијата на тоа одговориле дека „секоја партија која носи одлука за формирање коалиција без партијата која добила најмногу гласови и најголема поддршка од народот на изборите, треба да знае дека во исто време носи одлука да се соочува со проблеми во иднина својствени на ситуации кога се игнорира волјата на мнозинството граѓани“.
„На забелешката дека постојат држави каде се случува победничката партија да не влезе во владејачката коалиција, беше одговорено дека во изминатите повеќе од десет години од внатре и однадвор беше постојано потенцирано дека Македонија е многу различен случај, дека не е иста со останатите земји и има една специфика, а тоа е мултиетничноста, и дека во таква ситуација исклучително е важно победникот кај македонските гласачи и победникот кај албанските гласачи секогаш да коалицираат. Сега кога ВМРО-ДПМНЕ е победник, и од внатре и однадвор се заборава тој принцип. Сите треба да знаат дека ако еднаш се прекрши тој принцип, истото ќе стане неповратлив процес. Затоа што не може тој принцип да важи по потреба, само кога на некој друг му одговара, и тоа веќе не е принцип. Доколку сега се отстапи од тој принцип, и свесно се прекрши, секој еден кој во иднина кога ќе се сменат околностите, ќе помисли да дојде и повторно да се обиде да не убедува да го воспоставуваме тој принцип, треба да знае дека без дискусија ќе биде избркан од штабот на партијата, а партијата ќе коалицира со кого ќе оцени дека е најдобро за самата партија и земјата, како што е и во другите држави“ пишува во соопштението на партијата.
Од ВМРО-ДПМНЕ на амбасадорката и одговориле дека најдобро би било предвремените парламентарни избори да се одржат заедно со локалните.