Откако вчера, лидерот на ВМРО-ДПМНЕ како единствен што не даде изјава за медиумите по средбата со еврокомесарот Јоанес Хан, утрово партијата соопштение до медиумите со кое информира за ставовите кои делегацијата ги презентирала пред Хан.
Средбата траела 3 часа, а од партијата велат дека нивната делегација отворено зборувала за директното мешање на надворешни фактори во создавањето на кризата, неприфатливата улога и мешање на неколку амбасадори во процесот на формирање на Владата, улогата на СЈО како политичка испостава на СДСМ. ВМРО-ДПМНЕ му кажале на Хан дека нивната партија е разочарана од Европската Комисија затоа што не осудиле „Тиранската платформа“.
„ВМРО-ДПМНЕ останува на позицијата дека на последните избори се случи политичка измама на граѓаните со тоа што платформата од Тирана, поставена како предуслов за формирање на Влада, воопшто не беше претставена пред граѓаните и тие не беа информирани за намерата на некои партии да извршат редефинирање на државата и изигрување на нејзиниот Устав. ВМРО-ДПМНЕ го потенцираше фактот дека мнозинството од македонскиот народ не може да биде оставено во опозиција и без право да учествува во раководењето и одлучувањето за иднината на својата држава, при тоа почитувајќи го истото право и на сите други граѓани. ВМРО-ДПМНЕ посочи дека предвремени избори секако ќе има, но колку побрзо се одржат тие, толку подобро за Република Македонија. Потребно е да се искористи можноста тие избори да се одржат заедно со локалните избори, во најбрз можен рок, со цел ставање конечен крај на долгогодишната криза, која во овие денешни околности очигледно не е во можност да заврши“, пишува во соопштението на ВМРО-ДПМНЕ.
На средбата со Хан присуствувале Никола Груевски, Антонио Милошоски, Илија Димовски, Александар Николоски и Христијан Мицковски.