Владеачкото мнозинство во Советот на град Скопје вечерва го изгласа предлогот на Комунална хигиена и дозволи да направи размена на деловните простории со управната зграда на Санос. Со овој договор градското претпријатие остана без целиот имот во центарот на Скопје, кој оди во рацете на бизнисменот Славе Распашковски.
Трампата се обиде да ја спречи координаторот на Советничката група на СДСМ Дамјан Манчевски, кој пред почетокот на денешната седница на Советот на Град Скопје, побара да се тргне од дневен ред. Манчевски посочи дека приоритет се граѓаните зафатени од поплавата и не би било во ред советниците да одлучуваат за милионска размена на имот, кога луѓе немаат ни кров над главата.
Предлогот на опозицијата да се тргне точката од дневен ред беше отфрлен со 21 гласа „против“, 3 „воздржани“ и 10 „за“.
Како што објави НОВАТВ со спорниот договор Комунална хигиена на бизнисменот Славе Распашковски му дава имот во строгиот центар на Скопје, а тој ја отстапува старата управна зграда на поранешната фабрика за автобуси ФАС 11 октомври.
Просториите на Комунална хигиена во строгиот центар на Скопје се проценети на 1.561.950 евра, додека зградата на фирмата Унитајарс Стил Импекс на Распашковски во општина Гази Баба е проценета на 4.939.104 евра. Разликата меѓу овие две суми, или 3.377.000 евра, Комунална хигиена ќе му ја доплати на Распашковски.
Освен кешот и атрактивниот деловен простор, Распашковски од Комунална хигиена секој месец ќе добива по 12.000 евра кирија за просторот во кругот на фабриката, што тој им го издава за да се паркираат возилата на градското претпријатие.
Директорот на Комунална хигиена, Ракип Дочи, за трампата вели дека ќе го реши вековниот проблем на претпријатието и дека е економски исплатлив. По 110 години од постоењето на фирмата, сите единици и служби ќе биле на едно место со што ќе се подобрела комуникацијата и ефикасноста, а скопјани ќе добивале поквалитетни услуги.
Овој контроверзен договор отвори амбис на уште поголеми сомнежи за криминал, кој се купил згради и земјиште во кругот на ФАС и зошто распадната фабрика стана златен бисер за во него да инвестираат бизнисмени и фирми блиски до власта.