ВМРО-ДПМНЕ бара одговорност од премиерот, Зоран Заев, и министерот за здравство, Венко Филипче, по синоќешната трагедија во која изгоре Ковид центарот во тетовската болница при што настрадаа 14 пациенти.
– За оваа трагедија граѓаните сакаат да имаат извештај кој ќе биде веродостоен и точен, изјави заменик-претседателот на ВМРО-ДПМНЕ, Владо Мисајловски.
Одговорност за трагедијата во Тетово бараат и опозициските партии. Претседателот на Алијансата за Албанците, Зијадин Села, рече дека овие се денови на жалост, а дека треба да се утврди одговорност.
– Во никој случај, не смеат да поминат без одговорност. Но, во секој случај, сите ние треба да бидеме блиски до членовите на семејствата, тешејќи ги колку што можеме. Самото наше присуство кај нив и пораките да издржиме се многу големи. Тоа значи многу за нив“, рече Села.
Претседателот Стево Пендаровски денеска изјави дека за трагедијата во Тетово е прерано да се бара одговорност, политичка или морална. Тој нагласи дека меѓународната истрага ќе го отфрли секој сомнеж за вистинската причина за пожарот во модуларната болница во Тетово.