Опозициската ВМРО-ДПМНЕ и денеска одржа прес-конференција, на која портпаролот Димче Арсовски ги повика, како што рече, МВР и Јавното обвинителство, да не молчат туку да излезат во јавност со информации за малверзации околу поврат на ДДВ.

Наводните сознанија вчера ги обелодени лидерот на ВМРО-ДПМНЕ Христијан Мицкоски кој рече дека вработени во УЈП  давале искази во полицијата за наводни финансиски малверзации околу повраток на ДДВ со што биле испумпани 20-30 милиони евра. Мицкоски притоа ги повика МВР и Обвинителството да го спроведат законот и да излезат со детали, во спротивно ВМРО ДПМНЕ ќе го направат тоа.

,,Затоа е многу важно дали МВР ќе излезе со детали и ќе го спроведува законот заедно со Обвинителството за организиран криминал или ние тоа ќе го направиме, ќе го обелодениме во јавноста, и тоа во детали со имиња и со точни фирми, кои се дел од ова би рекол злосторничка здружина“, изјави Христијан Мицкоски претседател на ВМРО ДПМНЕ.

УЈП на тоа реагираше со соопштение во кое наведе дека лани во јули ги известиле истражните органи дека постојат сомнежи во врска со некои даночни обврзници, но дека во ниту еден момент не била загрозена државната каса, ниту пак парите на граѓаните.

„Во интерес на предистражната постапка на Јавното Обвинителство, информираме дека сите потребни материјали и податоци од страна на УЈП се доставени до институциите и дека се преземени сите потребни мерки во насока на заштита на државната каса“, се вели во соопштението на УЈП.

НОВА се обрати за коментар и до главната обвинителка за борба со организиран криминал и корупција Вилма Русковска, која ни рече дека во врска со ова се води повеќемесечна предистражна постапка, по примено известување од УЈП. Во изјава за НОВА таа ги повикува граѓаните за сите сознанија да се обратат до надлежните институции.

„Нема потреба од собирање на евтини  политички поени. Ако некој има сознанија за сторено кривично дело должен е истото да го пријави во надлежните институции“, ни изјави Русковска.

Со реакција се јавија и од СДСМ. Тие го обвинија Мицкоски дека загрозува постапки на надлежните институции.