Германија смета дека мандатот за формирање влада треба да и се даде на втората по големина партија во Македонија, му рекла германската амбасадорка Кристине Алтхаузер на претседателот на ВМРО-ДПМНЕ, Никола Груевски. Во партиското соопштение по нивната денешна средба се наведува дека Груевски ја прашал дали тоа е нејзина сугестија, на што таа одговорила дека „тоа е онака како што во моментот се гледа во Берлин“.
Претседателот на ВМРО-ДПМНЕ, Никола Груевски заедно со членовите на Извршниот комитет Никола Попоски, Никола Тодоров и секретарот за меѓународна соработка Александар Николоски се сретнале со германската амбасадорка Кристине Алтхаузер.
Како што соопштија од партијата, Груевски на средбата посочил дека ситуацијата е зрела за брзи избори, бидејќи кој и да формира Влада ќе има потешкотии во функционирањето на парламентот и Владата поради тесното мнозинство, при што брзи избори се најдоброто решение.
„Она што се очекува е одлуката на претседателот Иванов, по што ВМРО-ДПМНЕ ќе се прилагоди на таквата одлука. Она што е потребно е да се даде мандатот на втората по големина партија во Македонија, на што Груевски запраша дали тоа е нејзина сугестија, по што германската амбасадорка се изјасни дека тоа е онака како што во моментот се гледа во Берлин“, пишува во соопштението на ВМРО-ДПМНЕ.
Во однос на доделување на мандатот Груевски посочил дека по одржаните избори тој треба да се додели на победничката партија како што стои во Уставот.
Средба Груевски – Шчербак
Лидерот на ВМРО-ДПМНЕ, Никола Груевски денеска имал средба и со амбасадорот на Русија во земјава Олег Шчербак, на која било разговарано за актуелната политичка состојба во Македонијa и во Русија. Средбата, како што соопштуваат од партијата, била на барање на рускиот амбасадор.
Во врска со формирањето на владина коалиција Груевски истакнал дека по неуспехот за состав на влада и истекот на мандатот од 20 дена, се создала „зрела ситуација за нови предвремени избори со цел завршување на политичката криза“.