ВМРО ДПМНЕ бара од премиерот Зоран Заев да ја информира јавноста за процесот на преговори со Грција, бидејќи како што се вели во партиското соопштение, „Владата не смее да молчи и да крие детали околу процесот на разговори“.
-Премиерот Зоран Заев вчера кажа дека била прифатлива географска одредница, но не кажа во чие име говори и која е таа одредница што за него е прифатлива. Не кажа ниту кој би бил опсегот на употреба, а премолчи и околу тоа дали станува збор само за географска одредница која би била за меѓународна употреба или тоа значи промена и на Уставот, односно уставното име, националноста и јазикот. Исто така, остана неодговорено и прашањето дали оваа географска одредница би имала англиска транскрипција или не, се вели во соопштението.
Според опозициската партија, граѓаните се интересираат и имаат право да знаат дали освен подготвеноста на Заев за географска одредница, тој е подготвен и на отстапки во однос на идентитетските одредници како јазикот, нацијата и меѓународните кодови.
Во врска со преименувањето на аеродромот и автопатот, ВМРО-ДПМНЕ посетуваат на нивниот став дека нема иредентизам во актуелните имиња. Од партијата сметаат дека граѓаните треба да слушнат дали одлуката на владата е дел од некоја поширока стратегија или повторно станува збор за еднострани постапки од кои Република Македонија нема никаква корист.