ВМРО-ДПМНЕ и коалицијата на јавен настан во среда (11 март) официјално ќе ги презентираат листите со кандидати за пратеници за изборите на 12 април. Претходно, тие треба да бидат потврдени на седница на Централниот Комитет (ЦК) што е закажана на 10 март, соопшти лидерот на партијата, Христијан Мицкоски на денешната прес конференција. Деновиве, рече тој, привршуваат анализите во партијата и договорите со коалициските партнери и многу скоро би можело да се знаат имињата на носителите на листите.

Во врска со преименувањето на двете училишта во општина Чаир, рече дека нема зошто да ги коментира различните изјави на Зоран Заев и кажа дека советничката група на ВМРО-ДПМНЕ гласала против овој предлог кој, како што додаде, се прави во предизборен период кога граѓаните се чувствителни на одредени теми. Укажа дека за министерот е важно преименувањето на две училишта во Чаир, но не и, на пример, реформирањето и реконструкцијата на средното училиште „Кирил Пејчиновиќ“ во Тетово каде учениците учат во супстандардни услови.

Коментирајќи го дополнителниот извештај на ЕК што беше објавен вчера, Мицкоски рече дека го прочитал и дека се согласува со него само во едно нешто, а тоа е барањето да се отпочнат преговори за влез на земјата во ЕУ, но потенцира дека тој ни оддалеку не ја отсликува реалноста во секторите што се наведени. Лидерот на ВМРО-ДПМНЕ изрази убедување дека и да дојде тој датум тој процес ќе го води нова влада која ќе биде предводена од ВМРО-ДПМНЕ која, како што повтори, има непроменет став во однос на интегрирањето на земјата во ЕУ. Според него, доколку по изборите влада формира СДСМ и Зоран Заев, земјата никогаш нема да дојде до посакуваното членство.

Мицкоски изрази несогласување дека билбордите со ликот на Зоран Заев кои вчера беа пребојувани се црна кампања, туку кажа дека тоа е констатирање на реалноста. Според него, лидерот на СДСМ самиот ги кажал пораките на билбордите што се бојадисуваа, а дел од нив, како што кажа, вечерта дури биле и палени. Полицијата фати лица кои ги палат овие билборди, рече тој, упатувајќи порака дека по 12 април ќе има одговорност.

„Би им порачал да ја прифатат критиката и да не уништуваат приватен имот“, рече Мицкоски.