На денешниот митинг на ВМРО-ДПМНЕ во Центар, претседателот на ВМРО-ДПМНЕ, Христијан Мицкоски, истакна дека оние 400-ни илјади кои не гласаа за Заев и оние милион гласачи кои останаа дома не се никакво зло, туку тоа е Македонија која се обедини против него.

– Зоран Заев во писмото кое го напишал и испратил до неговото членство, на индиректен начин вика дека тие што не гласале за него, биле злото. Јас не мислам така, јас велам тие 400 илјади кои излегоа и не гласаа за Заев и тие милион гласачи кои одлучија да останат дома не се никакво зло, тоа е Македонија. Тоа е Македонија која бара помени и иднина. Македонија која се обединува против Заев и вели доста е. Доста е од се што до сега видовме, истакна Мицкоски.

Кандидатката за градоначалник на општина Центар, Наташа Котлар, им се заблагодари за своите сограѓани што ја поддржале.

– Нашата визија за Центар е секогаш да биде функционална, модерна и современа општина како што ѝ доликува. Ова го велам затоа што сум сериозна во намерата да ја елиминираме онаа култура која не покажува современо и модерно однесување, ние сериозно мислиме да ги менуваме нештата и во доменот на урбаното градење, во екологијата да воспоставиме принципи, мерила и мерки, за здрава средина и здрав живот, ни треба културен живот кој во нашата програма го имаме и во која се опфатени и пензионерите и младите, рече Котлар.

Независната кандидатка за градоначалник на Скопје, Данела Арсовска, која е поддржана од ВМРО – ДПМНЕ, истакна дека промените во Центар се извесни, а општина Центар ќе биде пример за тоа како треба да изгледа општина во европска метропола.

– Нашата визија за Центар е тој да биде пример за тоа дека во Скопје можеме да живееме во европска модерна метропола, а токму од Центар ќе почнат промените за следните четири години, разликата е 8000 гласови во првиот круг е јасна и е предвесник на промените кои доаѓаат, за десет дена Центар и Скопје ќе имаат нови градоначалници кои ќе бидат ветерот на промените, рече Арсовска.