Најголемата опозициска партија ВМРО-ДПМНЕ вечерва најави дека ќе поднесе кривична пријава против градоначалникот на Гази Баба Борче Георгиевски и против советниците во Општината. Според партијата ребалансот на буџетот во Општина Гази Баба е донесен на насилен и криминален начин.
– Борче Георгиевски старо-новиот пулен на Зоран Заев за Гази Баба, брутално и насилнички го презеде советот, го исклучи претседавачот на советот и украде 150 милиони денари од од општинската каса на Гази Баба . Со една цел- изборен поткуп. Цели 31 час непрекинато траеше седницата на која советниците на ВМРО-ДПМНЕ го спречуваа грабежот. Спречуваа грабеж и втор ребаланс на општинската каса за само 20 дена. Борче Георгиевски нервозен и во паника зошто не му поминува криминалот направи уште еден криминал и сам донесе одлука за ребаланс, надвор од закон и секоја правна логика. И тоа се откако дозна дека е повторно кандидат за гарадоначалник миленик на Заев, изјави вечерва портпаролот на ВМРО-ДПМНЕ, Наум Стоилковски.
Тој тврди дека Георгиевски ја злоупотребил својата службена положба и овластување, бидејќи. како што вели, спротивно на закон е донесена одлука за гласање на ребалансот на буџет, а самиот Георгиевски не е претседавач на Советот.
– Георгиевски е исплашен и до гуша заглавен во криминал.Видео снимката која ќе ја пуштиме во прилог на оваа изјава покажува како Георгиевски го крши законот, и на сила без правен основ донесува одлука за ребаланс на буџетот. Ова е кривично дело за кое и Георгиевски и советниците кои гласале ќе сносат одговорност и за кое ќе се најдат пред лицето на правдата, вели Стоилковски.
Од Општина Гази Баба соопштија дека мнозинство советници во Советот на Општината го изгласаа новиот ребаланс на буџетот за 2021 година. Според Општината, ребалансот на буџетот во Општината нови 146 милиони денари, средства наменети за подобрување на инфраструктурата во општината преку изградба на улици, водоводни и канализациони мрежи.
– Лажни и лицемерни се обвинувањата на советниците од ВМРО-ДПМНЕ. Фактите говорат дека токму советниците на ВМРО-ДПМНЕ преку неосновани процедурални излагања и чести барања паузи ја блокираа работата на Советот. Граѓаните треба да знаат дека 56 седница на Советот започна на 29.07.2021 година (четврток) во 12 часот, а дневниот ред за работа на седницата беше донесен дури во 19:30 часот. Исто така лага е дека предложениот ребаланс не поминал на комисиите во Советот. Факт кој може да се провери во службите на општината, е дека сите комисии за работа на Советот уредно беа закажани и заседаваа. Лага е дека советниците на ВМРО-ДПМНЕ немаа можност да поднесат амандмани на предложениот ребаланс. Факт е дека мнозинството и градоначалникот прифати 5 предложени амандмани од страна на советничката група на ВМРО-ДПМНЕ, а останатите предложени амандмани самата советничка група на седницата ги повлече, информираат од Општина Гази Баба.
Оттаму уверуваат дека изминатите три години буџетот е стабилен и ликвиден и оти сите предложени ребаланси на буџетот на општината биле за зголемување на приходите со нови средства.
– Жалиме што советниците на ВМРО-ДПМНЕ и по триесет часовната расправа, не се одважија да гласаат за ребалансот, во кој беа вградени и нивните предложени амандмани и да ја напуштија 56 седница на Советот. Општина Гази Баба останува посветена на граѓаните решавајќи ги проблемите кои ги мачат, велат од Општина Гази Баба.